ಕರ್ನಾಟಕ ಸರ್ಕಾರ ಭೂದಾಖಲೆ ಇಲಾಖೆಯಲ್ಲಿ ಮೂಲ ದಾಖಲೆಗಳ ಪ್ರಮಾಣೀಕೃತ ಪ್ರತಿಗಳನ್ನು ಪಡೆಯಲು ಹೊಸ ಹಾಗೂ ಏಕರೂಪ ಶುಲ್ಕ ವ್ಯವಸ್ಥೆಯನ್ನು ಜಾರಿಗೊಳಿಸಿದೆ. ಈ ಪರಿಷ್ಕೃತ ದರಗಳು ರಾಜ್ಯದಾದ್ಯಂತ ಅನ್ವಯವಾಗಲಿದ್ದು, ಸಾರ್ವಜನಿಕರಿಗೆ ಶುಲ್ಕದ ಕುರಿತು ಸ್ಪಷ್ಟತೆ ಮತ್ತು ಏಕರೂಪತೆ ಒದಗಿಸುವ ಉದ್ದೇಶ ಹೊಂದಿವೆ.

ಹೊಸ ನಿಯಮಗಳ ಪ್ರಕಾರ, ಅಟ್ಲಾಸ್ ಟಿಪ್ಪಣಿ, ಹಿಸ್ಸಾ ನಂಬರ್ ಖರ್ದು ಉತಾರ, ಕರಾಬು ಉತಾರ ಹಾಗೂ ಜಲ ಸಂಪನ್ಮೂಲ ವಿವರಗಳ ಪ್ರತಿಗಳಿಗೆ ₹35 ಶುಲ್ಕ ನಿಗದಿಪಡಿಸಲಾಗಿದೆ. ಸರ್ವೇ ನಂಬರ್ ನೋಟಿಸ್ ಪ್ರತಿಗಳು, ಅರ್ಜಿ ಪ್ರತಿಗಳು ಹಾಗೂ ಮಹಜರ್ ಪ್ರತಿಗಳಿಗೆ ₹10 ಶುಲ್ಕ ವಿಧಿಸಲಾಗುತ್ತದೆ.

ಇದಲ್ಲದೆ, ನಗರ ಸರ್ವೇ PT ಶೀಟ್, ಫೀಲ್ಡ್ ಬುಕ್ ಪ್ರತಿಗಳು ಹಾಗೂ ವಿಚಾರಣಾ ನೋಂದಣಿ ದಾಖಲೆಗಳಿಗೆ ಪ್ರತಿ ದಾಖಲೆಗೆ ₹30 ಶುಲ್ಕ ಅನ್ವಯವಾಗುತ್ತದೆ. RR ಪಕ್ಕಾ ಬುಕ್ (ಎಡ ಮತ್ತು ಬಲ ಭಾಗ) ಹಾಗೂ RR ನೋಟ್ ಬುಕ್ ಪ್ರತಿಗಳಿಗೆ ₹35 ಶುಲ್ಕ ನಿಗದಿಯಾಗಿದೆ.

ವಿಶೇಷವಾಗಿ, ಗ್ರಾಮ ಅಥವಾ ನಗರ ನಕ್ಷೆಯ ಪ್ರತಿಯ ಗಾತ್ರ 500 ಚದರ ಇಂಚುಗಳನ್ನು ಮೀರಿದರೆ ಸಾಮಾನ್ಯ ಶುಲ್ಕದ ದ್ವಿಗುಣ ದರ ಪಾವತಿಸಬೇಕಾಗುತ್ತದೆ.

ಈ ಪರಿಷ್ಕೃತ ಶುಲ್ಕ ವ್ಯವಸ್ಥೆಯನ್ನು ಸರ್ವೇ ಮತ್ತು ಭೂದಾಖಲೆಗಳ ಆಯುಕ್ತರು ಪ್ರಕಟಿಸಿದ್ದು, ಆದೇಶವು ತಕ್ಷಣದಿಂದಲೇ ಜಾರಿಗೆ ಬಂದಿದೆ. ಭೂದಾಖಲೆಗಳ ಪ್ರತಿಗಳನ್ನು ಪಡೆಯುವ ನಾಗರಿಕರು ಹಾಗೂ ವೃತ್ತಿಪರರು ಹೊಸ ದರಗಳ ಬಗ್ಗೆ ಮಾಹಿತಿ ಹೊಂದಿರುವುದು ಅಗತ್ಯವಾಗಿದೆ.